ശ്രീമഹാദേവ ക്ഷേത്രത്തിന് തെക്കുഭാഗത്ത് ശ്രീധര്‍മ്മ ശാസ്താക്ഷേത്രം സ്ഥിതിചെയ്യുന്നു. ഒരു കാലത്ത് ഈ ക്ഷേത്രത്തിന് കൊടിമരപ്രതിഷ്ഠ ഉണ്ടായിരുന്നതായും കരുതുന്നു. ശാസ്താവിന്റെ നിറസാന്നിധ്യമായി കരുതുന്ന ഈ ക്ഷേത്രത്തില്‍ ശനിയാഴ്ച ദിവസങ്ങളില്‍ ഭക്തജനങ്ങള്‍ സമര്‍പ്പിക്കുന്ന നീരാഞ്ജനം പ്രസിദ്ധമാണ്‌. പരിസരപ്രദേശങ്ങളില്‍ ഒന്നുംതന്നെ കാണാത്ത തിരക്ക് ശനിയാഴ്ച ദിവസങ്ങളില്‍ അനുഭവപ്പെടുന്നു. ഇവിടെ സമര്‍പ്പിക്കുന്ന നീരാഞ്ജനം പ്രത്യേക ഹോമകുണ്ഡത്തില്‍ അഗ്നിദേവന് സമര്‍പ്പിക്കുന്നത് ക്ഷേത്രത്തിന്റെ മാത്രം പ്രത്യേകതയാണ്. ശനിദോഷനിവാരണത്തിന് നിരവധി അനുഭവസമ്പത്തുമായി ഭക്തജനങ്ങള്‍ വഴിപാട്‌ നടത്തിവരുന്നു. നെയ്യഭിഷേകം മറ്റൊരു പ്രത്യേകതയാണ്. മണ്ഡലകാലങ്ങളില്‍ ഈ പ്രദേശത്തെ ഭക്തജനങ്ങള്‍ കെട്ടുനിറക്കായി ഇവിടെ എത്തുന്നതു കാരണം പ്രത്യേക സ്ഥലം സജ്ജമാക്കി വിശാലമായ ഹാളില്‍ അയ്യപ്പന്‍കെട്ടിനായുള്ള വ്യവസ്ഥ, മണ്ഡലകാല പ്രത്യേകഭജന എന്നിവയും നടക്കുന്നു.