ശ്രീമാടന്‍ നടയുടെ തെക്ക് ഭാഗത്തായി യക്ഷിയമ്മയുടെ ക്ഷേത്രം സ്ഥിതിചെയ്യുന്നു. രണ്ട് പ്രതിഷ്ഠകള്‍ ക്ഷേത്രത്തിനുള്ളില്‍ ഉള്ളതായി കാണാം. മുകള്‍ഭാഗം തുറസ്സായി നിര്‍മ്മിച്ചിട്ടുള്ള ഈ ശ്രീകോവിലില്‍ ഭക്തജനങ്ങള്‍ കന്യാവിന് വള, പൊട്ട്, കണ്മഷി തുടങ്ങിയവ സമര്‍പ്പിച്ച് അഭയം തേടുന്നു. വിജനവും തുറസ്സും വിശാലവുമായിരുന്ന ഈ പ്രദേശത്ത് യക്ഷിയമ്മയുടെ സാന്നിധ്യം ഭക്തജനങ്ങള്‍ നേരില്‍ അനുഭവിച്ചിട്ടുള്ള നിരവധി അനുഭവകഥകള്‍ പ്രചാരത്തില്‍ ഉണ്ട്. നിത്യവും നിവേദ്യം, വിളക്ക് എന്നിവ ഇവിടെ നടന്നു വരുന്നു. കന്യാവിന് സമര്‍പ്പണവുമായി ദൂരദേശങ്ങളില്‍ നിന്നുപോലും ഭക്തജനങ്ങള്‍ ഇവിടെ എത്താറുണ്ട്.